كلنا إباحيون !!

 "انتهيت للتو من قراءة رواية المبدع يوسف زيدان " ظل الأفعي

وانتهيت للتو أيضاً من نقاش حاد مع والدي عندما ناداني من غرفتي ليطلعني علي فيديو إباحي منسوب ل " عبد الحليم قنديل " علي شاشة قناة دينية ( واخد بالك قناة دينية وفيديو إباحي قمة الإلتزام يعني ) ويعلق بعدها : هو دا الراجل اللي بيتكلم فالسياسة ؟ 

فاجأته بالسؤال : ومال الكلام دا بالسياسة ؟ هو حر ! 

كان الرد سريعاً : لا مادام عمل كدا يبقي راجل غير مسئول وميستحقش يتكلم عن حاجة يبقي راجل مش نضيف ! 

انا : كدا كل رجالة مصر زبالة ! مين فمصر نضيف بكلامك دا ؟! قولي كدا مين نضيف ! مفيش راجل فمصر نضيف ! 

الحاج : .................... ضحكة خفيفة وصمت طويل 

نعم يا سادة، يا من تتحدثون يومياً عن العفة والنقاء، عن الدين والتدين، عن احترام الرجال وهيبتهم. 

كنت في معزل تام عن العالم حتي وصلت تقريباً نهاية دراستي الثانوية، تشبعت خلال تلك الفترة بنظريات الكتب و الدراسات الدينية و الأفكار المختلفة، صدمت كثيراً عندما بدأت أخالط حياتي العادية مع البشر وصدمت أكثر لقدر التناقض العظيم الذي نسبح فيه كل يوم ! وليتنا نكتفي بالتناقض ! بل ونصر علي أننا محقون ! 

نعم، 

انا وأبناء جيلي جميعاً ممن تعاملت معهم، ممن يدعون الإحترام واحترام الحياء، نعم كلنا مدَّعون وأنا أولهم، كلنا نمثل يومياً دور الرجل المحترم أمام الناس وأمام الفتيات تحديداً – وعلي الفيس بوك خاصة – ممكن تهزق صاحبك عادي ، تشتمه بأفظع الشتائم، تبهدله، في أي مكان وعلي أي جروب مادام مفهوش بنات ! لكن مجرد كلمة بسيطة – حتي لو مش شتيمة – في جروب فيه بنات – ويا سلام لو بنات دفعة – اااااااااه كدا خسرتوا بعض. 

نعم، 

نحن الجيل الذي أصبح فيه ( لايك ) علي البوست يعني لايك لصاحب البوست ! ممكن تدخل فيه لصاحبك انبوكس عشان تقوله اعملي لايك علي البوست بتاعي ! عشان عدد اللايكات الأكتر يدل علي انك محبوب أكتر ! اه والله بتحصل ، ولو معملتش لايك وقعتك سودة ومهببة. 

ايون، 

احنا جيل الرجالة اللي كل واحد فيه بيمشي مع 10 او 20 واحدة، ويعتبر دا مرجلة، ولو اخته فكرت تكلم واحد يروح يقتلها ! احنا اللي لو حصل حوار صغير بين اي اتنين حتي اي زميل وزميلة لازم يبقي علي لسان الناس كلها تاني يوم ! 

ايون، 

احنا الجيل اللي يتفرج علي كل الأفلام والمسلسلات بكل الخلاعة اللي ممكن حد يتصورها، ويكمل عالنت باقي الخلاعة التي لا حدود لها، ويفتح الفيس يكتب لا إله إلا انت سبحانك إني كنت من الظالمين ! ويقوم يتوضي ويصلي ! ويرجع يكمل الفيلم ...! 

احنا الجيل اللي لما باسم يوسف يقول كلمتين نقول قليل الأدب ! وبيوتنا طول النهار القنوات والأجهزة فيها إباحة علنية بالقول والفعل ! وكلامنا مع بعض كله ألفاظ زبالة أساساً. 

احنا اللي بندعي اننا عقول متحضرة ! وقاعدين طول النهار فالشارع نحكي عن دي وعن دي، وننهش ف عرض دي، ونعري أي واحدة تعدي قدامنا، بالنظرات وبالتعليقات والغمزات وغيرها وغيرها، ولازم الوصف يكون شامل وكامل ! 

احنا الشباب والرجالة اللي كلمة ست بالنسبالنا معناها متعة ! حاجة ملكنا ! حاجة بنتحكم فيها ! لازم لما تيجي تتجوز تدور علي مزة ! اه مزة بس تكون صاروخ جامدة حشد يعني ! 

لازم تفرج عليها صحابك فالفرح وقرايبك ونسايبك وجيرانك وناس يمكن متعرفهمش من اساسه ! مش بعيد تطلب رأيهم كمان ! 

لازم تدبحلها القطة مالأول ! تعرفها إنك راجل تديها فوق دماغها ! 

لازم تطنشها شوية ! متخليهاش تعلي صوتها عليك ! ........ مش هكمل طبعاً قائمة اللوازم طويلة ! 

لو قعدت أطلع تناقضات هنحتاج مجلدات ومش هنخلص، بس انا شخصياً تعبت من كتر التناقضات ! 

مش عارف امتي هنقول كفاية ؟ 

امتي هنعرف إن الست كائن زيه زينا ؟ ونبطل نتعامل مع الجسد المتحرك اللي لازم نقيمه تقييم كامل كل مرة يعدي فيها قدامنا ! امتي هنفكر بعقلنا مش بغرائز حيوانية ؟ امتي هنفهم إني مش لازم اقتل طموحها عشان اظهر انا انسان ناجح ؟ امتي هبطل اتعامل معاها كعورة لازم البسها سواد وأخفيها عشان ارضي غرائزي كراجل ؟ امتي الواحد هيدور علي عقلية الواحدة اللي هيحملها إسمه مش جسم الموزة اللي هيخلف منها إينه ! 

امتي هنعرف اني مش بطل عشان انتقدت المسيحيين ومش محتاج تهنوني ؟ ولا انا وسخ ومعنديش دين ومنافق عشان انتقدت ناس بتسمي نفسها شيوخ ؟ ولا انا محتاج رأيك فيا من أصله ولا بيهمني فحاجة ! 

امتي هنعرف ان شغل المراهقين والنظرات والكلام الفاضي سبب معظم مشاكلنا ! لو عايزة حاجة من واحدة هروح اقولها اللي انا عايزه ! مش مضطر اني اتظاهر واتخيل 

واعيش فالوهم ! 

ملحوظات أخيرة : 

1- انا بقول كدا وانا عارف اني اكثر تناقضاً من أي حد، وعارف إني أكثر ذنوباً من أي حد، نتاج نفس المجتمع المتناقض الغبي، استغفر الله واتوب إليه. 

2- مترفعش حواجبك وتجهز الردود وتنزل تهاجم، وتقولي دي من الشريعة ودي ضرورة دينية، وفر كلامك عشان عارفه ودرسته من يجي 12 سنة وحافظه. 

3- البنات برضو ينطبق عليها نفس الكلام، وإن كانوا أكثر منا إباحية اليومين دول ( وأنا مسئول عن كلامي ) وأكثر منا فكل حاجة ما شاء الله عليهم. 

4- الكلام ليس مقصود منه التعميم، لكل قاعدة شواذ، وعارف إن كل واحد بيقول لنفسه إن هو الحالة الشاذة، ماشي يا سيدي انا بس اللي ........... :)