1. في ظل ما نشهده من ثورتنا العظيمة. - والناس اللي مش عاجبها الجزيرة - تفتح قناة مصرية تشوف برنامج كامل كل موضوعه إن المتظاهرين في ميدان التحرير كانو بياكلوا كنتاكي!!! وناس تتصل تأكد وناس تتصل تنفي وتعارض !!! في إي يا جماعة هو كنتاكي دا جريمة ولا مخدرات ولا إي؟؟؟ ولا هما المتظاهرين مكتوب عليهم يعيشوا بعيش وحلاوة يعني ؟؟؟!!!!
2. ( إذا مقدرتش تواجههم .... إربكهم ) سياسة حكومتنا المصونة وسياسة الحزب الوطني منذ نشأته. وإحنا الشباب والشعب أكبر من يدعم هذه السياسة. بدل ما نتناقش فتعديلات الدستور وإي المواد اللي تتعدل ومجلس الشعب والطوارئ.... 10 قنوات تلفزيونية تناقش كنتاكي في ميدان التحرير. ومئات تناقش شخصية المتظاهرين ونناقش الإخوان عددهم كام ونسينا أصلا إحنا طالعين لي. والناس ارتبكت فالبيوت ومحدش عارف هو عاوز إي .... فلتعلم يا عزيزي أنك نفذت أيضا سياسة الحزب بكل حذافيرها. الأولوية الأولي إنك تتابع مطالبك سواء في ثورة فالميدان أو مفيش. مش كل واحد فالح يناقش فتفاهات لا جدوي منها !!!
3. كل اللي بيحصل فبلدك يفكرك بلقطة واحدة من فيلم ( طير أنت ) لما أحمد مكي تقمس دور حسن شحاته – ودول اللي عملوا نفسهم نواب عن شباب الثورة واللي بيناقشوا عالفيس ويقولك كفاية مظاهرات تعبنا– لما قال لميدو أنا القائد بقولك إطلع يعني تطلع. طلع ميدو يا جدعان. النتيجة بقت 3 – 2 فثانية – ما الحكومة والريس رجعوا فكلامهم خلاص – دول نفسهم هييجوا يقولولك " طاب نعمل إي ننزل ميدو تان؟؟؟ " وفي الآخر هتلاقي نفس الحركة اللي كان بيعملها أحمد مكي ( سوري مش عارف أكتبها إزاي هو المؤلف ساعتها كان بيكتبها إزاي صحيح فالورق!!!. اللي يعرف يقولي والنبي)
4. كل اللي تتناقش معاه فالفترة دي وتحصره وميعرفش ينطق قصادك هيقولك رد من 2: يا إما هيقولك نصيحة مني عدل طريقتك فالحوار عشان كدا مينفعش، يا إما هيقولك أنا خلاص زهقت من كل دا أنا منسحب من الحوار لأنه غير مثمر. طاب يا عم مفكرتش تقول لنفسك أنا موقفي بجد ضعيف ومينفعش طريقتي فالحوار دي ؟؟؟؟؟؟؟؟؟
5. من أهم فوائد الثورة أن كل واحد دلوقتي لو والده جه يتكلم معاه عن الثورة وإنه ضد مبارك يقول لوالده وبكل فخر " جيلنا هو اللي عمل كل دا انتوا سكتوا وسلمتونا البلد خربانة " وقبل أي حد أنا نفسي عملتها وكان رده سريع جدا " ماحنا مكانش عندنا فيس بوك طيب " في هذه اللحظة فقط تذكرت أنه من 8 أيام فقط كان بيقولي " يابني متضيعش وقتك عالفيس بوك ".
6. عليك أن تفخر أنك مصري. والإحصاء الجديد من معهد البحوث البرطاني يشير إلي أن أغني رجل فالعالم لم يعد ( بل جيتس ) الذي تقدر ثروته ب56 مليار دولار فقد ظهر من هو أغني منه. أنه ( محمد حسني مبارك ) الذي تتراوح ثروته في البنوك الأوروبية ونجله جمال من 40 إلي 70 مليار دولار مع العلم أن البنوك السويسرية رفضت الإفصاح عن محتويات حساباته فيها. مش عايز أسمع صوت بني آدم يقولي مصر خسرت كام مليون جنيه فالفترة دي بقي. شوف اللي هبشه الريس منك الأول..
7. شوف حكومتك قد إي ذكية. محافظ الدقهلية يتورط بمستندات فاضحة لتسيير مظاهرات لصالح مبارك والإعلام نايم ولما المتظاهرين ياكلوا كنتاكي الدنيا كلها تتقلب. طاب بزمتك دا كلام !!!!!
0 comments:
إرسال تعليق